AI Act Documents:
Commission Implementing Regulation (EU) 2026/1755

Evaluations and Proceedings Implementing Act

beta

This implementing regulation sets out how the Commission conducts evaluations of general-purpose AI models under Article 92 of the AI Act and how it runs proceedings that may end in a fine under Article 101. It covers the technical means by which providers must grant access to a model, the appointment and selection of independent experts, the opening and closing of proceedings, written observations on preliminary findings, access to the file, the protection of confidential information, and limitation periods. It entered into force on 10 August 2026.

Download official PDF See official text on EUR-Lex
Language

These are the complete, official texts exactly as published in the Official Journal of the European Union. Please report issues to websites@futureoflife.org.

Artikoli 15
The main substance of the Act
Premessi 6
Context and commentary to the Act
123456

Free, independent, and here to stay.

Our goal is to build the most useful, authoritative, and comprehensive guide to the AI Act anywhere on the internet. We'll never put this behind a paywall or use it to sell you a service. We do this because we think good AI governance matters, and that means making authoritative guidance genuinely accessible.

If you want to help, consider contributing a guest post or sending your ideas and feedback to Taylor, Design & Web Manager at: websites@futureoflife.org.

To stay up-to-date, subscribe to our bi-weekly AI Act newsletter — read by over 50,000 subscribers.

Built and maintained by the Future of Life Institute — the world's oldest and largest nonprofit working for the responsible development of AI.

↓ Scroll to read

Conduct of Evaluations and Proceedings

Commission Implementing Regulation (EU) 2026/1755 of 20 July 2026

KAPITOLU I
Dispożizzjonijiet Ġenerali Iftaħ bħala paġna

Artikolu 1: Suġġett u kamp ta’ applikazzjoni Iftaħ bħala paġna

Dan ir-Regolament jistabbilixxi:
(a) l-arranġamenti u l-kundizzjonijiet dettaljati għall-evalwazzjonijiet tal-mudelli tal-IA bi skop ġenerali, inkluż l-arranġamenti dettaljati għall-involviment ta’ esperti indipendenti u l-proċedura għall-għażla tagħhom, skont l-Artikolu 92 tar-Regolament (UE) 2024/1689;
(b) l-arranġamenti u s-salvagwardji proċedurali dettaljati għall-proċedimenti fid-dawl tal-adozzjoni possibbli ta’ deċiżjonijiet skont l-Artikolu 101(1) tar-Regolament (UE) 2024/1689.
KAPITOLU II
Twettiq Tal-Evalwazzjonijiet u Esperti Indipendenti Iftaħ bħala paġna

Artikolu 2: Aċċess għall-mudelli tal-IA bi skop ġenerali Iftaħ bħala paġna

1. Meta l-Kummissjoni tadotta deċiżjoni li titlob aċċess għal mudell tal-IA bi skop ġenerali skont l-Artikolu 92(3) tar-Regolament (UE) 2024/1689, dik id-deċiżjoni għandha tispeċifika l-mezzi tekniċi, l-għodod, il-komponenti u l-kundizzjonijiet, inkluż il-limitu taż-żmien, li bihom il-fornitur għandu jagħti dak l-aċċess. Id-deċiżjoni tista’ tispeċifika wkoll rekwiżiti tekniċi minimi, inkluż fir-rigward tal-prestazzjoni, il-latenza u t-throughput meħtieġa biex issir l-evalwazzjoni.
2. L-aċċess mitlub għandu jkun xieraq għall-objettivi tal-evalwazzjoni. Dak l-aċċess jista’ jinkludi aċċess b’interfaċċi għall-ipprogrammar tal-applikazzjonijiet (“APIs”), aċċess intern, aċċess għall-kodiċi sors, aċċess għall-ponderazzjonijiet tal-mudell, aċċess għall-infrastruttura li tospita l-mudell tal-IA bi skop ġenerali, aċċess għal spezzjoni u modifika tal-istat tas-sistema waqt interazzjoni mal-mudell. Dak l-aċċess jista’ jinkludi iżda mhuwiex limitat għal-livelli kollha tal-aċċess mogħtija lill-impjegati tal-fornitur. Il-fornituri tal-mudelli tal-IA bi skop ġenerali li jintalbu jagħtu aċċess għandhom jiżguraw li l-aċċess mogħti ma jkunx soġġett għal restrizzjonijiet tekniċi jew restrizzjonijiet oħra li jxekklu materjalment evalwazzjoni xierqa.
3. Il-Kummissjoni tista’ titlob lill-fornitur jiddiżattiva xi miżura ta’ lloggjar li tista’ tintraċċa jew tirrekordja l-aċċess tal-Kummissjoni għall-mudell tal-IA bi skop ġenerali, sa kemm ikun meħtieġ biex ikunu żgurati l-integrità u l-kunfidenzjalità tal-proċess tal-evalwazzjoni.
4. Il-fornituri tal-mudelli tal-IA bi skop ġenerali mitluba jagħtu aċċess skont l-Artikolu 92(3) tar-Regolament (UE) 2024/1689 għandhom jagħtu dak l-aċċess mingħajr dewmien u fil-limitu taż-żmien stabbilit fid-deċiżjoni meħuda skont il-paragrafu 1, biex il-Kummissjoni tkun tista’ taċċessa l-elementi kollha tal-mudell tal-IA bi skop ġenerali kkonċernat li huma meħtieġa biex jintlaħqu l-objettivi stabbiliti fl-Artikolu 92(1) tar-Regolament (UE) 2024/1689.

Artikolu 3: Esperti indipendenti Iftaħ bħala paġna

1. Meta l-Kummissjoni taħtar espert indipendenti biex iwettaq l-evalwazzjonijiet f’isimha skont l-Artikolu 92(2) tar-Regolament (UE) 2024/1689, din għandha tqis, għall-finijiet tal-valutazzjoni tal-indipendenza ta’ dak l-espert minn kull fornitur tas-sistemi tal-IA jew tal-mudelli tal-IA bi skop ġenerali f’konformità mal-Artikolu 68(2)(b) ta’ dak ir-Regolament, l-eżistenza ta’ sjieda kondiviża, governanza, immaniġġjar, persunal, jew riżorsi tal-espert ikkonċernat, kull ħatra preċedenti biex isiru evalwazzjonijiet f’isem il-Kummissjoni, kif ukoll l-eżistenza ta’ relazzjonijiet kuntrattwali bejn l-espert u l-fornitur ikkonċernat jew xi fornitur ieħor f’xi żmien tul imqar 12-il xahar qabel l-evalwazzjoni mwettqa mill-Kummissjoni. L-espert maħtur għandu jibqa’ indipendenti tul il-perjodu tal-ħatra. Kull espert indipendenti maħtur għandu jagħmel dikjarazzjoni ta’ interess skont it-tifsira tal-Artikolu 10(3) tar-Regolament ta’ Implimentazzjoni tal-Kummissjoni (UE) 2025/454 3Ir-Regolament ta’ Implimentazzjoni tal-Kummissjoni (UE) 2025/454 tas-7 ta’ Marzu 2025 li jistabbilixxi r-regoli għall-applikazzjoni tar-Regolament (UE) 2024/1689 tal-Parlament Ewropew u tal-Kunsill fir-rigward tal-istabbiliment ta’ bord xjentifiku ta’ esperti indipendenti fil-qasam tal-intelliġenza artifiċjali ([ĠU L, 2025/454, 10.3.2025, ELI: http://data.europa.eu/eli/reg_impl/2025/454/oj](https://data.europa.eu/eli/reg_impl/2025/454/oj))..
2. Biex tkun żgurata l-kunfidenzjalità tas-sigrieti kummerċjali u informazzjoni kunfidenzjali oħra, l-esperti maħtura skont l-Artikolu 92(2) tar-Regolament (UE) 2024/1689 għandhom jimpenjaw ruħhom li jżommu l-kunfidenzjalità, l-integrità u d-disponibbiltà għall-Kummissjoni ta’ informazzjoni sensittiva li għaliha jirċievu aċċess bis-saħħa tal-ħatra tagħhom, f’konformità mal-Artikolu 78 tar-Regolament (UE) 2024/1689. Qabel taħtar espert, il-Kummissjoni għandha tqis u tivvaluta jekk l-espert għandux fis-seħħ jew għandux aċċess għal protokolli interni u esterni dwar is-sigurtà tal-informazzjoni. L-esperti għandhom jimpenjaw ruħhom li jżommu protokolli tas-sigurtà xierqa matul il-perjodu tal-ħatra tagħhom.
3. L-esperti għandhom jikkonformaw mal-Artikolu 339 tat-Trattat dwar il-Funzjonament tal-Unjoni Ewropea.
4. L-Artikolu 78(2) tar-Regolament (UE) 2024/1689 għandu japplika mutatis mutandis għall-esperti indipendenti maħtura skont l-Artikolu 92(2) tar-Regolament (UE) 2024/1689.
5. Rigward l-esperti indipendenti maħtura biex iwettqu l-evalwazzjoni tal-mudell tagħhom, il-fornituri jistgħu jippreżentaw osservazzjonijiet motivati biex juru tħassib relatat mal-assenza tal-kriterji stabbiliti fl-Artikolu 92(2) tar-Regolament (UE) 2024/1689.
6. Il-Kummissjoni tista’ ttemm il-ħatra tal-espert indipendenti meta:
(a) ikun hemm bidla materjali fiċ-ċirkostanzi msemmija fil-paragrafu 1 li toħloq dubji serji dwar l-indipendenza ta’ espert indipendenti;
(b) l-espert jonqos milli jħaddem miżuri adegwati biex jiżgura l-kunfidenzjalità tas-sigrieti kummerċjali u informazzjoni kunfidenzjali oħra skont il-paragrafu 2;
(c) fornitur jippreżenta osservazzjoni motivata skont il-paragrafu 4 li turi b’mod ċar u inekwivoku l-assenza tal-kriterji stabbiliti fl-Artikolu 92(2) tar-Regolament (UE) 2024/1689.

Artikolu 4: Għażla tal-esperti indipendenti Iftaħ bħala paġna

1. Il-Kummissjoni għandha taħtar esperti indipendenti skont l-Artikolu 92(2) tar-Regolament (UE) 2024/1689 wara sejħa għal espressjoni ta’ interess abbażi tal-kriterji tal-għażla stabbiliti f’dik is-sejħa. Il-Kummissjoni tista’ tistabbilixxi lista permanenti ta’ esperti indipendenti abbażi ta’ sejħa għal espressjoni ta’ interess. Il-Kummissjoni tista’ tagħżel esperti indipendenti minn dik il-lista mingħajr proċedura tal-għażla ulterjuri.
2. Minkejja l-paragrafu 1, il-Kummissjoni tista’ taħtar esperti indipendenti direttament meta l-esperti kkonċernati jkunu membri tal-bord xjentifiku stabbilit skont l-Artikolu 68 tar-Regolament (UE) 2024/1689.
3. Il-Kummissjoni tista’ taħtar ukoll esperti indipendenti biex iwettqu evalwazzjonijiet f’isimha billi tħaddem proċedura skont l-Artikolu 167 tar-Regolament (UE, Euratom) 2024/2509 tal-Parlament Ewropew u tal-Kunsill 4Ir-Regolament (UE, Euratom) 2024/2509 tal-Parlament Ewropew u tal-Kunsill tat-23 ta’ Settembru 2024 dwar ir-regoli finanzjarji applikabbli għall-baġit ġenerali tal-Unjoni ([ĠU L, 2024/2509, 26.9.2024,ELI: http://data.europa.eu/eli/reg/2024/2509/oj](https://data.europa.eu/eli/reg/2024/2509/oj))..
KAPITOLU III
Proċedimenti Iftaħ bħala paġna

Artikolu 5: Ftuħ tal-proċedimenti Iftaħ bħala paġna

1. Il-Kummissjoni tista’ tibda proċedimenti fid-dawl tal-adozzjoni possibbli ta’ deċiżjonijiet skont l-Artikolu 101(1) tar-Regolament (UE) 2024/1689 fir-rigward ta’ imġiba rilevanti minn fornituri ta’ mudelli tal-IA bi skop ġenerali kif stabbilit f’dak l-Artikolu.
2. Minkejja l-paragrafu 1, il-Kummissjoni tista’ teżerċita s-setgħat tagħha skont it-Taqsima 5 tal-Kapitolu IX tar-Regolament (UE) 2024/1689 qabel ma tiftaħ il-proċedimenti skont dak il-paragrafu.
3. Qabel il-ftuħ tal-proċedimenti skont il-paragrafu 1, il-Kummissjoni tista’, b’deċiżjoni, tordna miżuri interim kontra fornitur ta’ mudell tal-IA bi skop ġenerali għal raġunijiet ta’ urġenza minħabba riskju ta’ dannu serju għas-saħħa, rekwiżiti tas-sikurezza, jew raġunijiet oħra relatati mal-interess pubbliku kopert mir-Regolament (UE) 2024/1689, inkluż biex ikun evitat li mudell tal-IA bi skop ġenerali jsir disponibbli fis-suq, abbażi ta’ sejba prima facie ta’ ksur ta’ dak ir-Regolament.

Artikolu 6: Għeluq tal-proċedimenti Iftaħ bħala paġna

1. Jekk wara l-bidu tal-proċedimenti skont l-Artikolu 5, il-Kummissjoni tiddetermina li m’hemmx raġuni biex tiġi adottata deċiżjoni skont l-Artikolu 101(1) tar-Regolament (UE) 2024/1689, din għandha tagħlaq il-proċedimenti permezz ta’ deċiżjoni. Jekk il-proċedimenti kienu nbdew wara lment minn fornitur downstream skont l-Artikolu 89(2) tar-Regolament (UE) 2024/1689, il-Kummissjoni għandha tagħti l-possibbiltà lill-ilmentatur biex jesprimi l-fehmietu qabel ma tadotta deċiżjoni li tagħlaq il-proċedimenti.
2. L-għeluq tal-proċedimenti f’konformità mal-paragrafu 1 ma għandux iwaqqaf lill-Kummissjoni milli terġa’ tiftaħ il-proċedimenti permezz ta’ deċiżjoni, inkluż meta l-miżuri mitluba skont l-Artikolu 93(3) tar-Regolament (UE) 2024/1689 ma jkunux effettivi jew meta l-impenji li jsiru vinkolanti b’deċiżjoni skont l-Artikolu 93(3) tar-Regolament (UE) 2024/1689 ma jiġux rispettati, jew meta d-deċiżjoni msemmija fil-paragrafu 1 tkun ibbażata fuq informazzjoni mhux kompluta, skorretta jew qarrieqa, jew ikun hemm bidla sinifikanti fir-riskji sistemiċi maħluqa mill-mudell tal-IA bi skop ġenerali kkonċernat fil-livell tal-Unjoni.
KAPITOLU IV
Salvagwardji Proċedurali Iftaħ bħala paġna

Artikolu 7: Osservazzjonijiet bil-miktub dwar is-sejbiet preliminari Iftaħ bħala paġna

1. Il-fornitur li lilu jiġu indirizzati s-sejbiet preliminari skont l-Artikolu 101(2) tar-Regolament (UE) 2024/1689 (id-“destinatarju”) jista’ jinforma lill-Kummissjoni bil-miktub u fil-qosor, u f’konformità mar-rekwiżiti tal-format u t-tul tad-dokumenti stabbiliti fl-Anness, bl-osservazzjonijiet tiegħu dwar dawk is-sejbiet u jippreżenta evidenza ta’ sostenn għalihom.
2. Id-destinatarju għandu jibgħat dawk l-osservazzjonijiet sal-limitu taż-żmien stabbilit mill-Kummissjoni li m’għandux ikun inqas minn 21 jum. Il-Kummissjoni m’għandhiex tkun obbligata tqis informazzjoni li tirċievi mingħand id-destinatarju meta jiskadi dak il-limitu taż-żmien.
3. L-informazzjoni ppreżentata lill-Kummissjoni skont il-paragrafu 1 għandha tkun korretta, kompluta u mhux qarrieqa. Għandha tiġi ppreżentata b’mod ċar, strutturat sew u li jingħaraf.
4. L-osservazzjonijiet bil-miktub imsemmija fil-paragrafu 1 għandhom ikunu b’waħda mil-lingwi uffiċjali tal-Unjoni. Id-dokumenti ta’ sostenn għandhom jiġu ppreżentati bil-lingwa oriġinali tagħhom u, meta l-lingwa oriġinali tagħhom ma tkunx waħda mil-lingwi uffiċjali tal-Unjoni, dawn għandhom ikunu akkumpanjati minn traduzzjoni leali b’lingwa uffiċjali tal-Unjoni.
5. Id-dokumenti, id-dokumentazzjoni teknika, il-kodiċi sors jew kull informazzjoni oħra għandha tiġu ppreżentata lill-Kummissjoni f’konformità mal-Artikolu 14.
6. Mal-informazzjoni ppreżentata lill-Kummissjoni skont il-paragrafu 1 għandha tinhemeż prova bil-miktub li l-persuni li qed jippreżentaw dik l-informazzjoni huma awtorizzati jaġixxu f’isem id-destinatarju tas-sejbiet preliminari kkonċernati.
7. Il-Kummissjoni għandha, mingħajr dewmien u bil-miktub, tibgħat konferma tal-wasla tal-informazzjoni ppreżentata skont il-paragrafu 1 lid-destinatarju tas-sejbiet preliminari kkonċernati jew lir-rappreżentanti tiegħu.

Artikolu 8: Aċċess għall-fajl Iftaħ bħala paġna

1. Meta tintalab, il-Kummissjoni għandha tagħti aċċess għall-fajl lid-destinatarju. L-aċċess għall-fajl ma għandux jingħata qabel in-notifika tas-sejbiet preliminari skont l-Artikolu 101(2) tar-Regolament (UE) 2024/1689.
2. Meta tipprovdi aċċess għall-fajl, il-Kummissjoni għandha tipprovdi lid-destinatarju d-dokumenti kollha msemmija fis-sejbiet preliminari, soġġetti għal redazzjonijiet skont l-Artikolu 9 biex jitħarsu s-sigrieti kummerċjali jew informazzjoni kunfidenzjali oħra.
3. Mingħajr preġudizzju għall-paragrafu 4, il-Kummissjoni għandha tipprovdi aċċess għad-dokumenti kollha fil-fajl tagħha, mingħajr redazzjoni, skont it-termini tal-iżvelar li trid tistabbilixxi l-Kummissjoni f’deċiżjoni. It-termini tal-iżvelar għandhom jiġu ddeterminati f’konformità ma’ dan li ġej:
(a) L-aċċess għad-dokumenti għandu jingħata biss lil għadd limitat ta’ konsulenti legali u ekonomiċi esterni u esperti tekniċi esterni speċifikati mqabbda mid-destinatarju u li l-ismijiet tagħhom għandhom jiġu kkomunikati lill-Kummissjoni bil-quddiem.
(b) Il-konsulenti legali u ekonomiċi esterni u l-esperti tekniċi esterni speċifikati għandhom ikunu impriżi, impjegati ta’ impriżi jew f’sitwazzjoni komparabbli ma’ dik ta’ impjegati tal-impriżi. Dawn għandhom ilkoll ikunu marbuta bit-termini tal-iżvelar.
(c) Il-persuni elenkati bħala konsulenti legali u ekonomiċi u esperti tekniċi esterni speċifikati ma jistgħux, dakinhar tad-deċiżjoni tal-Kummissjoni li tistabbilixxi t-termini tal-iżvelar, ikunu f’relazzjoni ta’ impjieg mad-destinatarju jew f’sitwazzjoni komparabbli ma’ dik ta’ impjegat tad-destinatarju. Jekk, waqt l-investigazzjoni jew tul it-tliet snin minn tmiem l-investigazzjoni tal-Kummissjoni, il-konsulent legali jew ekonomiku estern jew l-esperti tekniċi esterni speċifikati sussegwentement jidħlu f’relazzjonijiet bħal dawn mad-destinatarju jew ma’ impriżi oħra attivi fl-istess swieq bħad-destinatarju, il-konsulent legali jew ekonomiku estern jew l-espert tekniku estern speċifikat u d-destinatarju għandhom jinformaw minnufih lill-Kummissjoni dwar it-termini ta’ dik ir-relazzjoni. Il-konsulent legali jew ekonomiku estern jew l-espert tekniku estern speċifikat inkwistjoni għandu jipprovdi wkoll assigurazzjoni lill-Kummissjoni li ma jkunx għad għandu aċċess għall-informazzjoni jew għad-dokumenti fil-fajl li għalihom ikun ingħata aċċess skont il-punt (a), u li ma kinux disponibbli għad-destinatarju mill-Kummissjoni. Għandhom jipprovdu assigurazzjonijiet ukoll lill-Kummissjoni li se jkomplu jikkonformaw mar-rekwiżiti msemmija fil-punt (d) ta’ dan il-paragrafu.
(d) Il-konsulenti legali u ekonomiċi esterni u l-esperti tekniċi esterni speċifikati ma għandhomx jiżvelaw id-dokumenti pprovduti jew il-kontenut tagħhom lil xi persuna fiżika jew ġuridika li mhix firmatarja tat-termini tal-iżvelar, u ma għandhomx jużaw id-dokumenti pprovduti jew il-kontenut tagħhom ħlief għall-finijiet imsemmija fl-Artikolu 8(10).
(e) Il-Kummissjoni għandha tispeċifika, fit-termini tal-iżvelar, il-mezzi tekniċi tal-iżvelar u d-durata tagħha. L-iżvelar jista’ jsir b’mezzi elettroniċi jew (għal uħud mid-dokumenti jew id-dokumenti kollha) fil-bini tal-Kummissjoni.
4. F’ċirkostanzi eċċezzjonali, il-Kummissjoni tista’ tiddeċiedi li ma tagħtix aċċess għal ċerti dokumenti jew li tagħti aċċess għal dokumenti parzjalment redatti, skont it-termini tal-iżvelar imsemmija fil-paragrafu 3, jekk ikun jidhirilha li l-ħsara li l-parti li ppreżentat id-dokumenti inkwistjoni aktarx iġġarrab bl-iżvelar skont dawk it-termini tkun fuq il-miżien tisboq l-importanza tal-iżvelar tad-dokument sħiħ għall-eżerċitar tad-dritt ta’ smigħ.
5. Id-dritt ta’ aċċess għall-fajl tal-Kummissjoni m’għandux jestendi għall-informazzjoni kunfidenzjali, għal korrispondenza u għal dokumenti interni tal-Kummissjoni, tal-Bord tal-IA, tal-Forum Konsultattiv, tal-bord xjentifiku, tal-awtoritajiet kompetenti tal-Istati Membri, u ta’ awtoritajiet kompetenti oħra. Xejn f’dan il-paragrafu m’għandu jwaqqaf lill-Kummissjoni milli tiżvela u tuża l-informazzjoni meħtieġa biex tagħti prova li jkun seħħ ksur.
6. Il-konsulenti legali u ekonomiċi esterni u l-esperti tekniċi esterni speċifikati msemmija fil-paragrafu 3 jistgħu, fi żmien ġimgħa minn meta jirċievu l-aċċess skont it-termini tal-iżvelar, jagħmlu talba motivata lill-Kummissjoni biex jaċċessaw verżjoni mhux kunfidenzjali ta’ kwalunkwe dokument fil-fajl tal-Kummissjoni li ma jkunx diġà ngħata lid-destinatarju skont il-paragrafu 2, biex dik il-verżjoni mhux kunfidenzjali ssir disponibbli għad-destinatarju, jew għal estensjoni tat-termini tal-iżvelar għal xi konsulenti legali u ekonomiċi esterni u esperti tekniċi esterni speċifikati addizzjonali. Dan l-aċċess addizzjonali jista’ jingħata biss b’mod eċċezzjonali u diment li jkun indispensabbli għall-eżerċitar xieraq tad-dritt tad-destinatarju li jinstema’.
7. Għall-finijiet tal-applikazzjoni tal-paragrafi 4 sa 6, il-Kummissjoni tista’ titlob lill-parti li tkun ippreżentat id-dokumenti inkwistjoni biex tipprovdi verżjoni mhux kunfidenzjali tagħhom, skont l-Artikolu 9.
8. Meta l-Kummissjoni tqis li talba skont il-paragrafu 6 jkollha bażi soda fid-dawl tal-ħtieġa li jkun żgurat li d-destinatarju jkun f’pożizzjoni li jeżerċita d-dritt tiegħu ta’ smigħ effettiv, il-Kummissjoni għandha titlob lill-parti li tkun ippreżentat id-dokument inkwistjoni li taċċetta li tipprovdi verżjoni mhux kunfidenzjali lid-destinatarju jew li taċċetta l-estensjoni tat-termini tal-iżvelar għal individwi jew impriżi speċifikati għad-dokumenti inkwistjoni biss.
9. Jekk il-parti li tkun ippreżentat id-dokumenti inkwistjoni ma taċċettax, il-Kummissjoni għandha tadotta deċiżjoni li tistabbilixxi t-termini tal-iżvelar għad-dokumenti inkwistjoni.
10. Id-dokumenti miksuba bis-saħħa tal-aċċess għall-fajl mogħti skont dan l-Artikolu għandhom jintużaw biss għall-finijiet tal-proċedimenti rilevanti li fihom ingħata l-aċċess għal dawk id-dokumenti jew ta’ proċedimenti ġudizzjarji jew amministrattivi li jikkonċernaw l-applikazzjoni tar-Regolament (UE) 2024/1689 u li huma relatati ma’ dawk il-proċedimenti.
11. Fi kwalunkwe ħin matul il-proċedura, il-Kummissjoni tista’, minflok il-metodu tal-għoti tal-aċċess għall-fajl skont il-paragrafu 3 ta’ dan l-Artikolu, jew flimkien miegħu, tagħti aċċess għal uħud mid-dokumenti jew għad-dokumenti kollha redatti skont l-Artikolu 9(3) biex tevita dewmien sproporzjonat jew piż amministrattiv.

Artikolu 9: Identifikazzjoni u protezzjoni tal-informazzjoni kunfidenzjali Iftaħ bħala paġna

1. Ħlief meta jkun previst mod ieħor fir-Regolament (UE) 2024/1689 jew fl-Artikolu 8 ta’ dan ir-Regolament, id-dokumenti jew informazzjoni oħra miksuba mill-Kummissjoni għall-finijiet ta’ proċedimenti miftuħa skont l-Artikolu 5(1) ta’ dan ir-Regolament m’għandhomx jiġu żvelati jew ipprovduti mill-Kummissjoni, meta dawn ikun fihom sigrieti kummerċjali jew informazzjoni kunfidenzjali oħra ta’ xi persuna fiżika jew ġuridika.
2. Il-Kummissjoni għandha tinforma lill-persuni fiżiċi jew ġuridiċi li jkunu l-oriġinaturi tad-dokumenti jew ta’ informazzjoni oħra miksuba mill-Kummissjoni għall-finijiet ta’ proċedimenti miftuħa skont l-Artikolu 5(1) ta’ dan ir-Regolament li l-aċċess għal dawk id-dokumenti jew għal dik l-informazzjoni jista’ jingħata skont l-Artikolu 8 ta’ dan ir-Regolament. Meta dawk il-persuni jkunu pprovdew dawk id-dokumenti jew dik l-informazzjoni lill-Kummissjoni volontarjament, dawn ikunu aċċettaw li l-aċċess għal dawk id-dokumenti u dik l-informazzjoni jista’ jingħata skont l-Artikolu 8.
3. Mingħajr preġudizzju għall-paragrafu 2, il-Kummissjoni tista’ titlob lil persuni fiżiċi jew ġuridiċi li jkunu l-oriġinaturi tad-dokumenti fil-fajl tagħha biex jidentifikaw id-dokumenti, id-dikjarazzjonijiet jew partijiet minnhom, li jikkunsidraw li fihom sigrieti kummerċjali jew informazzjoni kunfidenzjali oħra, u biex jidentifikaw il-persuni fiżiċi u ġuridiċi li fir-rigward tagħhom dik l-informazzjoni titqies kunfidenzjali. Il-Kummissjoni tista’ tistabbilixxi limitu taż-żmien sa meta l-persuni fiżiċi jew ġuridiċi għandhom jidentifikaw partijiet minn deċiżjoni tal-Kummissjoni li fil-fehma tagħhom ikun fihom sigrieti kummerċjali jew informazzjoni kunfidenzjali oħra.
4. Il-Kummissjoni tista’ tistabbilixxi limitu taż-żmien għall-persuni fiżiċi jew ġuridiċi biex:
(a) jissostanzjaw id-dikjarazzjonijiet tagħhom dwar is-sigrieti kummerċjali u informazzjoni kunfidenzjali oħra għal kull dokument individwali jew parti minnu;
(b) jagħtu verżjoni mhux kunfidenzjali lill-Kummissjoni tad-dokumenti li fihom jiġu redatti b’mod ċar u li jinftiehem is-sigrieti kummerċjali u informazzjoni kunfidenzjali oħra;
(c) jipprovdu deskrizzjoni konċiża u mhux kunfidenzjali ta’ kull biċċa informazzjoni redatta.
5. Jekk persuna fiżika jew ġuridika tonqos milli tikkonforma mal-paragrafi 3 u 4, il-Kummissjoni tista’ tqis li l-informazzjoni kkonċernata ma jkunx fiha sigrieti kummerċjali jew informazzjoni kunfidenzjali oħra.
6. Jekk il-Kummissjoni tiddetermina li ċerta informazzjoni li tiġi ddikjarata kunfidenzjali minn persuna fiżika jew ġuridika tista’ tiġi żvelata, għax dik l-informazzjoni ma tkunx tikkostitwixxi sigriet kummerċjali jew informazzjoni kunfidenzjali oħra, jew għax ikun hemm interess prevalenti li tiġi żvelata, din għandha tinforma lill-persuna fiżika jew ġuridika li beħsiebha tiżvela dik l-informazzjoni sakemm ma tirċevix oġġezzjonijiet fi żmien ġimgħa. Jekk il-persuna fiżika jew ġuridika inkwistjoni toġġezzjona, il-Kummissjoni tista’ tadotta deċiżjoni motivata li tispeċifika d-data minn meta se tiġi żvelata l-informazzjoni. Din id-data m’għandhiex tkun inqas minn ġimgħa mid-data tan-notifika. Id-deċiżjoni għandha tiġi notifikata lill-persuna fiżika jew ġuridika kkonċernata.

Artikolu 10: Perjodi ta’ preskrizzjoni għall-impożizzjoni tal-penali Iftaħ bħala paġna

1. Il-Kummissjoni tista’ tadotta deċiżjoni li timmulta lil fornitur speċifiku ta’ mudell tal-IA bi skop ġenerali għal xi mġiba elenkata fl-Artikolu 101(1) tar-Regolament (UE) 2024/1689 fi żmien ħames snin mill-jum meta tkun twettqet dik l-imġiba minn dak il-fornitur.
2. Fil-każ ta’ mġiba kontinwa jew ripetuta, il-perjodu ta’ ħames snin imsemmi fil-paragrafu 1 għandu jibda mill-jum meta tieqaf l-imġiba.
3. Kull azzjoni li tieħu l-Kummissjoni għall-finijiet ta’ investigazzjoni jew proċedimenti tagħha fir-rigward ta’ xi mġiba elenkata fl-Artikolu 101(1) tar-Regolament (UE) 2024/1689 għandha tinterrompi l-perjodu ta’ preskrizzjoni għall-impożizzjoni tal-multi jew il-pagamenti perjodiċi tal-penali. L-azzjonijiet li jinterrompu d-dekorrenza tal-perjodu għandhom jinkludu dan li ġej:
(a) talbiet għal dokumentazzjoni jew informazzjoni oħra;
(b) talbiet għal aċċess biex isiru evalwazzjonijiet ta’ mudell;
(c) stediniet għal djalogu strutturat;
(d) il-ftuħ ta’ proċediment.
4. Kull interruzzjoni tal-perjodu msemmi fil-paragrafu 1 għandha tiskatta d-dekorrenza taż-żmien mill-bidu. Iżda l-perjodu tal-preskrizzjoni għandu jiskadi mhux aktar tard mill-jum meta jkun għadda ammont ta’ żmien daqs id-doppju tal-perjodu tal-preskrizzjoni mingħajr ma l-Kummissjoni tkun imponiet multa jew pagament perjodiku ta’ penali. Dak il-perjodu għandu jiġi estiż biż-żmien li matulu l-preskrizzjoni tkun ġiet sospiża skont il-paragrafu 5.
5. Il-perjodu ta’ preskrizzjoni għall-impożizzjoni tal-multi jew tal-pagamenti perjodiċi tal-penali għandu jiġi sospiż sakemm id-deċiżjoni tal-Kummissjoni tkun is-suġġett ta’ proċedimenti pendenti quddiem il-Qorti tal-Ġustizzja tal-Unjoni Ewropea.

Artikolu 11: Perjodi ta’ preskrizzjoni għall-infurzar tal-penali Iftaħ bħala paġna

1. Is-setgħa tal-Kummissjoni li tinforza deċiżjonijiet adottati skont l-Artikolu 101(1) tar-Regolament (UE) 2024/1689 għandha tkun soġġetta għal perjodu ta’ preskrizzjoni ta’ ħames snin.
2. Iż-żmien għandu jibda jiddekorri mill-jum meta d-deċiżjoni adottata skont l-Artikolu 101(1) tar-Regolament (UE) 2024/1689 issir finali.
3. Il-perjodu msemmi fil-paragrafu 1 għandu jiġi interrott:
(a) b’notifika ta’ deċiżjoni li tvarja l-ammont oriġinali tal-multa jew tal-pagament perjodiku tal-penali, jew li tirrifjuta l-applikazzjoni għal varjazzjoni;
(b) b’xi azzjoni tal-Kummissjoni jew ta’ Stat Membru, li jaġixxi wara talba tal-Kummissjoni, imfassla biex tinforza l-ħlas tal-multa jew tal-pagament perjodiku tal-penali.
4. Kull interruzzjoni tal-perjodu msemmi fil-paragrafu 1 għandha tiskatta d-dekorrenza taż-żmien mill-bidu.
5. Il-perjodu ta’ preskrizzjoni għall-infurzar tal-penali għandu jiġi sospiż sakemm:
(a) ikun permess iż-żmien għall-ħlas; jew
(b) jiġi sospiż l-infurzar ta’ pagament skont deċiżjoni tal-Qorti tal-Ġustizzja tal-Unjoni Ewropea jew skont deċiżjoni ta’ qorti nazzjonali.
KAPITOLU V
Dispożizzjonijiet Ġenerali u Finali Iftaħ bħala paġna

Artikolu 12: Bidu tal-perjodi taż-żmien Iftaħ bħala paġna

1. Mingħajr preġudizzju għall-paragrafu 2 ta’ dan l-Artikolu, il-limiti taż-żmien skont ir-Regolament (UE) 2024/1689 u dan ir-Regolament għandhom jiġu kkalkolati f’konformità mar-Regolament (KEE, Euratom) Nru 1182/71.
2. B’deroga mill-paragrafu 1 ta’ dan l-Artikolu, il-perjodi taż-żmien għandhom jibdew jiddekorru mill-jum tax-xogħol ta’ wara l-avveniment li għalih tirreferi d-dispożizzjoni rilevanti tar-Regolament (UE) 2024/1689 jew ta’ dan ir-Regolament.

Artikolu 13: Stabbiliment tal-limiti taż-żmien Iftaħ bħala paġna

1. Meta l-Kummissjoni tistabbilixxi limitu taż-żmien skont ir-Regolament (UE) 2024/1689 jew dan ir-Regolament, din għandha tqis kif xieraq l-elementi rilevanti kollha tal-fatti u tal-liġi u l-interessi kollha kkonċernati, b’mod partikolari l-possibbiltà li l-persuni fiżiċi jew ġuridiċi jeżerċitaw id-dritt tagħhom ta’ smigħ u l-espedjenza tal-proċedimenti jew l-investigazzjoni.
2. Meta xieraq u wara talba motivata mill-fornitur ikkonċernat qabel l-iskadenza tal-limitu taż-żmien stabbilit mill-Kummissjoni, il-limitu taż-żmien jista’ jiġi estiż. Meta tiddeċiedi jekk tagħtix dik l-estensjoni, il-Kummissjoni għandha tivvaluta jekk it-talba motivata hix issostanzjata biżżejjed u jekk l-estensjoni mitluba jistax ikollha effetti negattivi fuq l-investigazzjonijiet jew il-proċedimenti.

Artikolu 14: Trażmissjoni u wasla tal-informazzjoni Iftaħ bħala paġna

1. It-trażmissjoni tad-dokumenti jew ta’ informazzjoni oħra lill-Kummissjoni u mingħandha għandha ssir b’mezzi diġitali. L-ispeċifikazzjonijiet tekniċi dwar il-mezzi tat-trażmissjoni u l-iffirmar jistgħu jinħarġu jew jiġu ppubblikati u aġġornati regolarment mill-Kummissjoni.
2. Id-dokumenti mibgħuta b’mezzi diġitali għandhom jiġu ffirmati mqar b’Firma Elettronika Kwalifikata waħda li tkun konformi mar-rekwiżiti stabbiliti fir-Regolament (UE) Nru 910/2014 tal-Parlament Ewropew u tal-Kunsill 5Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal transazzjonijiet elettroniċi fis-suq intern u li jħassar id-Direttiva 1999/93/KE ([ĠU L 257, 28.8.2014, p. 73](http://publications.europa.eu/resource/oj/JOL_2014_257_R_TOC), ELI: [http://data.europa.eu/eli/reg/2014/910/oj](http://data.europa.eu/eli/reg/2014/910/oj))..
3. Id-dokumenti mibgħuta lill-Kummissjoni b’mezzi diġitali għandhom jitqiesu li jkunu waslu fil-jum meta tkun intbagħtet konferma tal-wasla mill-Kummissjoni.
4. Għall-informazzjoni fil-ħin reali jew kważi fil-ħin reali kondiviża b’APIs jew b’xi mezz ekwivalenti ieħor, il-Kummissjoni għandha tiddefinixxi l-metodu u d-durata ta’ dik il-kondiviżjoni tal-informazzjoni. Qabel ma tiddefinixxi l-metodi u d-durata, il-Kummissjoni tista’ tistieden lill-fornitur jipproponi metodi oħra ta’ kondiviżjoni tal-informazzjoni fil-ħin reali.
5. Id-dokumenti u kull informazzjoni oħra mibgħuta lill-Kummissjoni b’mezzi diġitali għandhom jitqiesu li ma waslux jekk isseħħ xi ċirkostanza minn dawn:
(a) id-dokument jew partijiet minnu jkunu inoperabbli jew ma jistgħux jintużaw;
(b) id-dokument ikun fih viruses, malware jew theddid ieħor;
(c) id-dokument ikun fih firma elettronika li l-validità tagħha ma tkunx tista’ tiġi verifikata mill-Kummissjoni.
6. Jekk isseħħ xi ċirkostanza msemmija fil-paragrafu 5, il-Kummissjoni għandha tinforma lill-mittent mingħajr dewmien u tagħtih il-possibbiltà li jesprimi l-fehmiet tiegħu u jirrettifika s-sitwazzjoni f’limitu ta’ żmien raġonevoli.
7. B’deroga mill-paragrafu 1, f’ċirkostanzi eċċezzjonali li jagħmlu t-trażmissjoni b’mezzi diġitali impossibbli jew eċċessivament diffiċli, id-dokumenti jistgħu jintbagħtu lill-Kummissjoni bil-posta reġistrata. Dawk id-dokumenti għandhom jitqiesu li jkunu waslu għand il-Kummissjoni fil-jum tal-konsenja tagħhom fl-indirizz tas-servizz responsabbli tal-Kummissjoni, kif ippubblikat mill-Kummissjoni fuq is-sit web tagħha.
8. B’deroga mill-paragrafi 1 u 7, f’ċirkostanzi eċċezzjonali li jagħmlu t-trażmissjoni b’mezzi diġitali jew bil-posta reġistrata impossibbli jew eċċessivament diffiċli, id-dokumenti jistgħu jintbagħtu lill-Kummissjoni bl-idejn. Dawk id-dokumenti għandhom jitqiesu li jkunu waslu fil-jum tal-konsenja tagħhom fl-indirizz tas-servizz responsabbli tal-Kummissjoni, kif ippubblikat mill-Kummissjoni fuq is-sit web tagħha. Il-konsenja għandha tiġi kkonfermata b’konferma tal-wasla mill-Kummissjoni.

Artikolu 15: Dħul fis-seħħ Iftaħ bħala paġna

Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Premessi

Premessa 1
Iftaħ bħala paġna
(1) L-Artikolu 92(1) tar-Regolament (UE) 2024/1689 jagħti s-setgħa lill-Kummissjoni li twettaq evalwazzjonijiet ta’ mudelli tal-intelliġenza artifiċjali (“IA”) bi skop ġenerali. L-Artikolu 92(2) tar-Regolament (UE) 2024/1689 jagħti s-setgħa lill-Kummissjoni li taħtar esperti indipendenti biex iwettqu l-evalwazzjonijiet f’isimha. L-Artikolu 92(3) tar-Regolament (UE) 2024/1689 jagħti s-setgħa lill-Kummissjoni li titlob aċċess għal mudell tal-IA bi skop ġenerali soġġett għal dawk l-evalwazzjonijiet, b’interfaċċi għall-ipprogrammar tal-applikazzjonijiet (“APIs”) jew għal mezzi u għodod tekniċi xierqa ulterjuri, inkluż il-kodiċi sors. Biex tiżdied iċ-ċertezza legali u tkun żgurata l-proporzjonalità, jixraq li l-Kummissjoni tintalab tispeċifika l-mezzi tekniċi, il-komponenti u l-kundizzjonijiet li bihom il-fornitur ta’ mudell bħal dan għandu jagħti dak l-aċċess. Jixraq ukoll jiġu stabbiliti l-arranġamenti dettaljati għall-involviment ta’ esperti indipendenti, meta l-Kummissjoni tiddeċiedi li taħtar tali esperti biex iwettqu l-evalwazzjonijiet f’isimha.
Premessa 2
Iftaħ bħala paġna
(2) L-Artikolu 101(1) tar-Regolament (UE) 2024/1689 jagħti s-setgħa lill-Kummissjoni li timmulta lill-fornituri tal-mudelli tal-IA bi skop ġenerali għal xi aġir jew ommissjonijiet elenkati f’dik id-dispożizzjoni. Biex titrawwem iċ-ċertezza legali u jingħataw salvagwardji proċedurali għal dawn il-fornituri, jixraq jiġu stabbiliti dispożizzjonijiet dwar il-ftuħ u l-għeluq tal-proċedimenti fid-dawl tal-adozzjoni possibbli ta’ deċiżjoni skont l-Artikolu 101(1) tar-Regolament (UE) 2024/1689. Il-ftuħ ta’ dawk il-proċedimenti jenħtieġ li jkun mingħajr preġudizzju għall-possibbiltà li l-Kummissjoni twettaq investigazzjonijiet u titlob miżuri qabel tali ftuħ.
Premessa 3
Iftaħ bħala paġna
(3) L-Artikolu 101(2) tar-Regolament (UE) 2024/1689 jeżiġi li l-Kummissjoni, qabel ma tadotta deċiżjoni skont l-Artikolu 101(1) ta’ dak ir-Regolament, tagħti lill-fornitur ta’ mudell tal-IA bi skop ġenerali li lilu tkun innotifikat is-sejbiet preliminari, l-opportunità li jinstema’ u li jipprovdi evidenza ta’ sostenn. Dawk il-fornituri jenħtieġ li jintalbu jippreżentaw l-osservazzjonijiet tagħhom dwar dawk is-sejbiet bil-miktub u fil-qosor, f’perjodu ta’ żmien stabbilit mill-Kummissjoni, biex li jiġu rikonċiljati l-effiċjenza u l-effettività tal-proċedimenti, minn naħa, u l-possibbiltà li jiġi eżerċitat id-dritt ta’ smigħ, min-naħa l-oħra.
Premessa 4
Iftaħ bħala paġna
(4) L-Artikolu 41(2)(b) tal-Karta tad-Drittijiet Fundamentali jirrikonoxxi d-dritt ta’ kull persuna li jkollha aċċess għall-fajl tagħha, filwaqt li jiġu rispettati l-interessi leġittimi tal-kunfidenzjalità u tas-segretezza professjonali u tan-negozju. Filwaqt li d-destinatarju tas-sejbiet preliminari jenħtieġ li dejjem jikseb mingħand il-Kummissjoni l-verżjonijiet mhux kunfidenzjali tad-dokumenti kollha msemmija f’dawk is-sejbiet, il-Kummissjoni jenħtieġ li tkun tista’ tiddeċiedi abbażi ta’ każ b’każ dwar il-proċedura xierqa għall-għoti ta’ aċċess ulterjuri għall-fajl. Meta tagħti dak l-aċċess, il-Kummissjoni jenħtieġ li tiżgura l-ħarsien tas-sigrieti kummerċjali u ta’ informazzjoni kunfidenzjali oħra. Il-Kummissjoni jenħtieġ li tkun tista’ titlob lil persuni li jippreżentaw jew li jkunu ppreżentaw informazzjoni jew dokumenti waqt il-proċedimenti biex jidentifikaw is-sigrieti kummerċjali jew informazzjoni kunfidenzjali oħra. Il-Kummissjoni, qabel ma tqiegħed l-informazzjoni għad-dispożizzjoni tad-destinatarju tas-sejbiet preliminari tagħha, jenħtieġ li tivvaluta għal kull dokument individwali, bil-ħsieb ta’ eżerċizzju effettiv tad-dritt ta’ smigħ, jekk il-bżonn ta’ żvelar jisboqx il-ħsara li jaf jagħmel l-iżvelar lill-parti li ppreżentat l-informazzjoni jew id-dokumenti.
Premessa 5
Iftaħ bħala paġna
(5) Fl-interess taċ-ċertezza legali, jixraq jiġu introdotti perjodi ta’ preskrizzjoni li jikkonċernaw il-possibbiltà li tinħareġ multa skont l-Artikolu 101(1) tar-Regolament (UE) 2024/1689, kif ukoll perjodi ta’ preskrizzjoni għall-infurzar tal-multi maħruġa skont l-Artikolu 101(1) ta’ dak ir-Regolament. Dawk il-perjodi jenħtieġ li jiġu regolati mir-Regolament tal-Kunsill (KEE, Euratom) Nru 1182/71 2Ir-Regolament (KEE, Euratom) Nru 1182/1971 tal-Kunsill tat-3 ta’ Ġunju 1971 li jistabbilixxi r-regoli applikabbli għal perjodi, dati u limiti ta’ żmien ([ĠU L 124, 8.6.1971, p. 1](http://publications.europa.eu/resource/oj/JOL_1971_124_R_TOC), ELI: [http://data.europa.eu/eli/reg/1971/1182/oj](http://data.europa.eu/eli/reg/1971/1182/oj))..
Premessa 6
Iftaħ bħala paġna
(6) Il-miżuri previsti f’dan ir-Regolament ta’ Implimentazzjoni huma f’konformità mal-opinjoni tal-Kumitat dwar l-Intelliġenza Artifiċjali,

Noti f'qiegħ il-paġna

↑[2] Ir-Regolament (KEE, Euratom) Nru 1182/1971 tal-Kunsill tat-3 ta’ Ġunju 1971 li jistabbilixxi r-regoli applikabbli għal perjodi, dati u limiti ta’ żmien (ĠU L 124, 8.6.1971, p. 1, ELI: http://data.europa.eu/eli/reg/1971/1182/oj).
↑[3] Ir-Regolament ta’ Implimentazzjoni tal-Kummissjoni (UE) 2025/454 tas-7 ta’ Marzu 2025 li jistabbilixxi r-regoli għall-applikazzjoni tar-Regolament (UE) 2024/1689 tal-Parlament Ewropew u tal-Kunsill fir-rigward tal-istabbiliment ta’ bord xjentifiku ta’ esperti indipendenti fil-qasam tal-intelliġenza artifiċjali (ĠU L, 2025/454, 10.3.2025, ELI: http://data.europa.eu/eli/reg_impl/2025/454/oj).
↑[4] Ir-Regolament (UE, Euratom) 2024/2509 tal-Parlament Ewropew u tal-Kunsill tat-23 ta’ Settembru 2024 dwar ir-regoli finanzjarji applikabbli għall-baġit ġenerali tal-Unjoni (ĠU L, 2024/2509, 26.9.2024,ELI: http://data.europa.eu/eli/reg/2024/2509/oj).
↑[5] Ir-Regolament (UE) Nru 910/2014 tal-Parlament Ewropew u tal-Kunsill tat-23 ta’ Lulju 2014 dwar l-identifikazzjoni elettronika u s-servizzi fiduċjarji għal transazzjonijiet elettroniċi fis-suq intern u li jħassar id-Direttiva 1999/93/KE (ĠU L 257, 28.8.2014, p. 73, ELI: http://data.europa.eu/eli/reg/2014/910/oj).
—
Compare across languages
Languages: